இன்று,
வாழ்த்து அட்டைகள்
குடும்ப அட்டைகளாக
வாய்ப்பு...
இன்று,
அணுக்கதிரின் அபாயம்
அறியாது புது மின்சாரம்
மனதில் பிறக்கும்...
இன்று,
மூளையில் பல்பு எரிய
மின்தடை இல்லை...
இன்று,
வாழ்த்து அட்டையிலும்
சிகப்பு ரோசாவிலும்
சில உயிர்கள்...
இன்று,
ஒவ்வொரு பரிசும்
தாஜ்மகால்தான்...
இன்று,
தூண்டில்கள்
புதிதோ பழையதோ
காத்திருக்கும்மீன்களுக்காக...
இன்று,
சட்டசபையில் விழிசிவந்து
விரல்நீட்டும் அளவு தைரியம்
காதல் சொல்வோர்க்கு...
இன்று,
அதிஷ்டம் அவசியம்
ஆண்களுக்கு, பெண்களுக்கல்ல...
இன்று,
வாழ்த்து அட்டைகிழியும்போதே
கிழியும்சிலரது இதயம்...
இன்று,
கூடும்
இதயங்களும்
பீச் பார்க்கின் வருகை பதிவும்...
இன்று,
அறிவுக்கும்
அறிவியலுக்கும்
ஆண்கர்வத்துக்கும் விடுமுறை...
இன்று,
ஆறாய் இன்பம்
ஆறாத துன்பம்
இரண்டில் ஒன்று...
இன்று,
அசட்டு புன்னகையால்
பெண்களுக்கு பூக்கள்
பிடிக்காது போகலாம்...
இன்று,
கால் கட்டைவிரலால்
பூமியில் அதிக பள்ளங்கள்...
இன்று,
நண்பர்களுக்கு நல்ல நாள்
முடிவு யாதெனினும் பார்ட்டி...
- சந்துரு
No comments:
Post a Comment